ҚР үкіметі хабарлайды: «Қаржы министрлігінің мәліметінше, Еуразиялық экономикалық одақтың (ҚХР, Өзбекстан Республикасы, Түрікменстан) сыртқы шекараларында биыл 9 өткізу пунктін жаңғырту жоспарланған. Қазіргі таңда оның төртеуі – Капланбек, Атамекен, Қолжат және Алакөл пункттері пайдалануға берілді. Қалған бес өткізу бекетінің жаңғыртужұмыстары жыл соңына дейін аяқталуы тиіс. Жоспардан тыс «Жібек жолы» жолаушылар өткізу пунктінде де жаңғырту жұмыстары жүргізілуде. Құрылыс жұмыстары 2026 жылдың бірінші жартысында толық аяқталады деп күтілуде. Баяндамаларды тыңдағаннан кейін Премьер-министр кеден қызметінің жұмысы тиісті деңгейде ұйымдастырылмағанын, сондай-ақ Ресей Федерациясы мен Қырғыз Республикасымен шекарадағы автокөлік өткізу бекеттеріндегі жөндеу жұмыстарының созылып кеткенін сынға алды. Олжас Бектенов Қаржы министрлігі Мемлекеттік кірістер комитетінің және Көлік министрлігіне қарасты Автомобиль жолдары комитетінің төрағаларын қызметтік міндеттерін тиісінше орындамағаны үшін жауапкершілікке тартуды тапсырды. Сонымен қатар, аталған министрліктердің жауапты өкілдері өңірлерге жіберіліп, жергілікті жерлерде жұмысты үйлестіру шараларын қолға алды.
Евразия24 пікірі:
6 тамыз күні Үкімет отырысы барысында бірқатар мәселелер көтерілді. Премьер-министр Олжас Бектенов Қаржы министрлігі мен Көлік министрлігінің лауазымды тұлғаларын сынға алып, екі комитеттің басшыларын жауапкершілікке тартуды тапсырды. Мұндай жағдай мемлекеттік басқару жүйесінде жиі кездесе бермейді. Бұл – Премьер-министрдің көтерілген мәселеге қатысты наразылығының айғағы. Алайда Үкімет бұл сынның нақты қандай себептерге негізделгенін егжей-тегжейлі хабарлаған жоқ. Ресми мәліметтерде кеден қызметінің әлсіз ұйымдастырылғаны және Қазақстанның Ресей мен Қырғыз Республикасымен шекаралас аймақтарындағы автокөлік өткізу бекеттеріндегі жөндеу жұмыстарының кешіктіріліп жатқаны ғана көрсетілген. Айта кетейік, шілде айында Ақтөбе облысындағы «Жайсан» өткізу пунктінде бірнеше шақырымға созылған көлік кептелісі орын алған болатын. Онда бірнеше тәулік бойы жолда қалған азаматтарға Төтенше жағдайлар министрлігінің құтқарушылары азық-түлік пен ауызсу жеткізген. Бұл жағдай Самара – Шымкент республикалық тас жолында мамыр айында басталған жөндеу жұмыстарына байланысты орын алған. Үкімет сынға алған Көлік министрлігі Автомобиль жолдары комитетінің төрағасы Төлеген Абдуллиннің өзі бұл жол кептелісінде болмағаны және шілденің аптап ыстығында азаматтар тап болған қиындықтарды бастан өткермегені анық.
