Ақорда хабарлайды: «Президент: «БҰҰ заман талаптарына сай келмейтін идеялар мен қағидалардан арылуы тиіс». «Ұйым осыдан 80 жыл бұрын құрылған, сондықтан оның ескіргенін, тіпті тоқырауға ұшырағанын айтушылардың пікірі орынды. Біз БҰҰ Жарғысындағы «жау мемлекеттер» деп аталатын ұғымдардың мазмұнына назар аударуымыз керек. Иә, 80 жыл бұрын бәрі де түсінікті еді. Ал бүгінде сол «жау мемлекеттер» Ұйымды қолдау мен қаржыландыруда, сондай-ақ бейбітшілікті сақтау үдерісіне жәрдемдесуде өте маңызды рөл атқарып отыр. Ең бастысы — БҰҰ-ның тиімділігі мен беделін арттыру», — деді Президент. Сонымен қатар, Қасым-Жомарт Тоқаев қақтығыстардың алдын алудағы превентивті дипломатияның маңыздылығына тоқталды. «Бұл мәселе көптеген жылдар бойы, кем дегенде соңғы 30 жыл ішінде талқыланып келеді. Алайда әдемі сөздер мен декларациялардан басқа ешқандай ілгерілеушілік байқалмайды. Меніңше, біз өңірлік немесе жаһандық қақтығыстарды болжау шараларына баса мән беруіміз керек, превентивті дипломатияның мәні де осында. Сонымен бірге тиімді көпжақты дипломатияны қолдау үшін күш біріктіруіміз қажет», — деп түйіндеді Мемлекет басшысы.
Еуразия24 пікірі:
Анталия дипломатиялық форумы аясындағы панельдік сессияға Қасым-Жомарт Тоқаевтың қатысуы айрықша мәнге ие болды. Президент көпполярлы әлемді қалыптастырудың қазіргі үдерістеріне қатысты бірқатар маңызды мәселелер бойынша пікір білдірді. Оның сөзінің өзекті бөлігі БҰҰ-ны реформалау мәселесіне арналды. Қазақстан Президенті ұйымды жаңғыртуға жауапкершілікпен қарауға шақырып, БҰҰ дағдарысының себептерінің бірі Қауіпсіздік Кеңесінің тұрақты мүшелерінің ұстанымдары екенін атап өтті. «Әрине, біз өзімізді әлемдегі ең үздік ел деп көрсетуге ұмтылмаймыз. Алайда жаһандық үдерістерге қатысты жоғары жауапкершілік деңгейін – іс жүзінде де, дипломатияда да – танытып келеміз. Сондықтан бүгінгі таңда орта державалар Қауіпсіздік Кеңесінде ұсынылған ірі мемлекеттерге қарағанда жиі жағдайда анағұрлым жоғары жауапкершілік көрсетеді деп айту артық емес. Өкінішке қарай, соңғылары негізгі жаһандық мәселелердің шешімін жиі тежейді», – деген Қасым-Жомарт Тоқаевтың бұл сөзі көптеген қақтығыстардың ушығу себептерін дәл көрсетеді, ал қазіргі форматтағы БҰҰ оларды тиімді түрде реттеуге қауқарсыз. Пікірталас барысында Гордана Силяновска-Давкова Қазақстан Президентінің БҰҰ қызметінде превентивтік дипломатияға ерекше назар аудару қажеттігі жөніндегі ұстанымын қолдады.
