Informburo хабарлайды: «Оқу-ағарту министрі Жұлдыз Сүлейменова мектептердегі оқу жүктемесінің жоғары екеніне қатысты депутаттардың сынына жауап берді. Қазіргі уақытта Қазақстанда жаңа білім беру стандарты сынақтан өткізіліп жатыр – апробация желтоқсан айының соңына дейін жалғасады. Нәтижелер талданғантары басталад соң жаңартылған оқу бағдарламаларын әзірлеу жұмысы. Министрдің айтуынша, қоғам мен сарапшылар тарапынан бастауыш сыныптағы математика пәнінің мазмұнына, сондай-ақ тілдік және жаратылыстану бағытындағы пәндерге қатысты орынды сұрақтар бар. Бұл ұсыныстар мамандармен бірлесіп қарастырылуда. Қазіргі стандартқа сәйкес қаралып жатқан өзгерістердің қатарында математика мен геометрияны біріктіру мүмкіндігі бар. Сонымен қатар, Жұлдыз Сүлейменова өз ұстанымын қайталап айтты: ол физика, химия және биология пәндерін «жаратылыстану ғылымдары» деген бірыңғай пәнге біріктіру идеясын қолдамайтынын жеткізді. Министр бұл пәндердің іргелі ғылымдар екенін және олардың жеке-жеке оқытылуы тиіс екенін алға тартты. Министрлік жекелеген пәндерді сақтап қалу жөнінде өз ұсыныстарын әзірлеп жатыр және сарапшылардың бағалауы мен оқушылардың мүдделерін ескере отырып шешім қабылданатынын хабарлады».
Евразия24 пікірі:
2025 жылдың ақпанында Ыбырай Алтынсарин атындағы Ұлттық білім академиясы вице-президенті Руслан Қаратүбенов Қазақстанда «химия», «физика», «биология» пәндерін бір пәнге – «жаратылыстану ғылымдарына», «дүниежүзі тарихы» мен «құқық негіздерін» – «әлеуметтік ғылымдарға», ал «алгебра» мен «геометрияны» – «математика» пәніне біріктіру идеясы сынақтан өтіп жатқанын мәлімдеген еді. Ашық айтқанда, мұндай тәжірибе әлем елдерінде бар. Мысалы, АҚШ-тың кейбір мектептерінде «General Science» немесе «Integrated Science» курстары оқытылады, мұнда оқушылар физика, химия және биология негіздерін бір пән аясында меңгереді. Әсіресе, бұл бастауыш және орта буын сыныптарына тән. Еуропаның бірқатар елінде де «жаратылыстану» немесе «жаратылыстану негіздері» сияқты пәнаралық курстар бар, олар биология, география, экология және кейде физика/химия пәндерінің элементтерін біріктіреді. Цифрландыру, еңбек нарығының өзгеруі және технологиялардың дамуы жағдайында балаларға тек дайын білім ғана емес, сонымен қатар шығармашылық, пәнаралық және жобалық дағдылар беру қажеттігі анық. Алайда, әдеттегідей асығыс енгізілген кез келген инновация, әсіресе Қазақстанда, нақты ғылымдар саласындағы іргетасты шайқалтып жіберуі мүмкін. Бұл пәндер – халықаралық олимпиадаларда, жоғары оқу орындарына түсу кезінде және бейінді мамандықтарда жұмысқа орналасуда шешуші рөл атқарады. Осыған байланысты жаңа министр Жұлдыз Сүлейменованың ұстанымы қисынды әрі орынды деп есептейміз. Оның ғылым өкілдері мен сарапшылардың пікірін қолдауы – атап айтқанда, базалық пәндерді цифрлық сауаттылық, 3D-дизайн немесе STEAM элементтері үшін сағат үнемдеу мақсатында біріктіруге түбегейлі қарсы көзқарасты бөлісуі – құптарлық іс.
