Баку. 1 мамыр. ИНТЕРФАКС – Еуропалық одақтың (ЕО) Бакудегі елшісі Марияна Куюнджич Әзірбайжан Сыртқы істер министрлігіне шақыртылып, оған Еуропалық парламенттің 30 сәуірде қабылдаған әзірбайжанға қарсы резолюциясына байланысты наразылық нотасы тапсырылды. Бұл туралы республиканың сыртқы саяси ведомствосы хабарлады.
«Әзірбайжан тарапы кездесуде Еуропалық парламенттің 30 сәуірдегі резолюциясында қамтылған елімізге қатысты негізсіз және біржақты ережелерді қатаң айыптады. Осыған байланысты елшіге наразылық нотасы тапсырылды», — делінген хабарламада.
Мәлімдемеде резолюция ережелерінің шындықты бұрмалайтыны, объективтілік принциптеріне, сондай-ақ мемлекеттердің егемендігі мен аумақтық тұтастығын құрметтеу жөніндегі міндеттемелерге қайшы келетіні атап өтілген.
«Кездесуде Еуропалық парламенттің мұндай тәсілі аймақтағы қалыпқа келтіру процесіне, сондай-ақ Әзірбайжан мен Еуропалық одақ арасындағы қарым-қатынастардың келешегіне кері әсерін тигізетіні атап көрсетілді», — деп мәлімдеді ведомство.
СІМ резолюциядағы армян тұрғындарының Қарабақ аймағына қайтып оралуы туралы тұжырымдар мүлдем негізсіз екенін, ал мұндай шақырулар Әзірбайжанның ішкі істеріне араласу сипатына ие екенін қосып өтті.
«ЕО елшісінің назарына 2023 жылы Әзірбайжан Конституциясына сәйкес ұсынылған реинтеграция жоспарына қарамастан, армян тұрғындарының аймақтан өз еркімен кеткені жеткізілді. Керісінше айтылған мәлімдемелер жалған болып табылады», — делінген ақпаратта.
Бұдан бөлек, кездесуде «әскери тұтқындар» ретінде көрсетілген армян текті адамдарды босату туралы шақырулардың құқықтық тұрғыдан қабылданбайтыны айтылды.
Ведомство дипломаттың есіне Әзірбайжанның гуманитарлық принциптерді басшылыққа ала отырып, тұтқындардың көпшілігін босатқанын және Армениямен сенімді нығайту шараларын қабылдағанын салды. Сонымен қатар, сот үкімі шыққан тұлғалар терроризм, диверсия және әскери қылмыстарды қоса алғанда, ауыр қылмыстар жасады деп айыпталуда.
СІМ сондай-ақ «армяндардың мәдени және діни мұрасын жою» туралы тұжырымдарды қабылданбайтын әрі негізсіз деп санайды. Сонымен бірге, ведомство Армения әзірбайжан аумақтарын оккупациялаған кезеңде Әзірбайжанның мәдени және діни мұрасының ауқымды түрде қиратылуы мен қорлану фактілерінің еуропалық институттар тарапынан тиісті бағасын алмағанына назар аудартады.
Сыртқы саяси ведомство ЕО өкілін Әзірбайжан-Еуропа қарым-қатынастарына, сондай-ақ аймақтағы бейбітшілік пен қалыпқа келтіру процесіне нұқсан келтіретін мұндай қадамдарға жол бермеуге шақырды.
