Вашингтон. 2 мамыр. ИНТЕРФАКС — АҚШ Мемлекеттік департаменті жұма күні Таяу Шығыстағы одақтастары — Израиль, Катар, Кувейт және Біріккен Араб Әмірліктеріне жалпы сомасы 8,6 миллиард доллардан асатын әскери техника сатуды мақұлдағанын мәлімдеді.
«АҚШ Мемлекеттік департаменті Израиль үкіметіне APKWS (Advanced Precision Kill Weapon System) жетілдірілген жоғары дәлдіктегі қару жүйесін және оған қатысты жабдықтарды сату мүмкіндігін мақұлдау туралы шешім қабылдады. Жобаның жалпы құны 992,4 миллион долларға бағаланып отыр», — делінген Мемлекеттік департаменттің мәлімдемесінде.
Құжатқа сәйкес, сондай-ақ Катарға 992,4 миллион доллар сомасына және Біріккен Араб Әмірліктеріне 147,6 миллион доллар сомасына APKWS жүйелерін сату мақұлданды.
Сонымен қатар, Мемлекеттік департамент Катар үкіметіне PATRIOT әуе шабуылына және зымыранға қарсы қорғаныс жүйесіне арналған жабдықтар мен қосалқы құралдарды 4,01 миллиард доллар сомасына сатуды мақұлдады.
Кувейт үкіметіне біріктірілген ұрысқа басшылық ету жүйесі мен оған қатысты жабдықтарды сату мүмкіндігі мақұлданды. Бұл жобаның жалпы құны 2,5 миллиард долларға бағалануда.
Мемлекеттік департаменттің мәлімдемесінен шығатыны, бұл шешімдер Америка Құрама Штаттарының ұлттық қауіпсіздік мүдделері үшін аталған елдерге қорғаныс тауарлары мен қызметтерін дереу сатуды талап ететін төтенше жағдайдың туындауына байланысты қабылданған.
Ұсынылып отырған бұл сатылымдар «ірі қорғаныс серіктесінің қауіпсіздігін арттыру арқылы Америка Құрама Штаттарының сыртқы саясаты мен ұлттық қауіпсіздік мақсаттарына қол жеткізуге ықпал етеді», — деп нақтылады ведомство.
