Астана. 29 сәуір. ИНТЕРФАКС-ҚАЗАҚСТАН – Чехия Қазақстаннан мұнай мен уранды ұзақ мерзімді негізде жеткізуге қызығушылық танытып отыр. Бұл туралы елдің премьер-министрі Андрей Бабиш Астанаға сапары барысында мәлімдеді.
«Біз Қазақстанды стратегиялық серіктес ретінде қарастырамыз. Бірлескен күш-жігер арқылы елдеріміз арасындағы тауар айналымын арттыра аламыз деп сенемін. Ең алдымен, энергетика саласындағы ынтымақтастықты нығайтқымыз келеді. Мұнайды ұзақ мерзімді жеткізуге ерекше мүдделіміз. Сонымен қатар, Қазақстан біз үшін уран өндіру бойынша әлемдегі жетекші ел ретінде де маңызды, өйткені біздің энергетика саласын дамыту стратегиямыз атом энергетикасына негізделген», – деді Бабиш, оның сөзін Қазақстан президентінің баспасөз қызметі келтіреді.
Ол бұл сапарды екіжақты қатынастарды жаңа деңгейге көтерудің бастапқы кезеңі ретінде қарастыратынын атап өтті.
Премьердің айтуынша, Қазақстанда энергия өндірудің әртараптандырылған тәсіліне негізделген тұрақты энергетикалық қауіпсіздік жүйесі қалыптасқан.
Сондай-ақ Бабиш чех компанияларының энергетика саласындағы бірлескен жобаларды іске асыруға қатысуға дайын екенін растады.
