Дубай. 18 тамыз. ИНТЕРФАКС – Иранның сыртқы істер министрі Аббас Аракчи күрдтерді арандатуға ермеуге шақырып, Ирак Күрдістанының премьер-министрі Масрур Барзанидің кеңсесіне жасалған шабуыл көршілердің арасына іріткі салуды көздейді деп мәлімдеді.
«Күрд достарымыз қырағы болып, көршілердің арасына жік салуды көздейтін арандатуларға ермеуі керек», – деп Аракчи X әлеуметтік желісінде жазба қалдырды.
Оның айтуынша, Ирактың Күрдістан аймағына жасалған шабуылды «ешқалай ақтауға келмейді».
Бұған дейін Ирактың сыртқы істер министрі Фуад Хусейн Аракчимен телефон арқылы сөйлесіп, дүйсенбі күні Эрбильдегі Күрдістан аймақтық үкіметінің кеңселеріне дрондармен жасалған соққыларды талқылады.
Ирак СІМ мәлімдемесінде Хусейн Күрдістан премьер-министрінің резиденциясы мен жеке кеңсесіне жасалған шабуылға қатысты Иранның ресми ұстанымын түсіндіруді сұрағаны айтылған. Ол бұл оқиға «Ирактың қауіпсіздығына және өңірдегі тұрақтылыққа кері әсер ететінін» атап өтті.
Иран СІМ басшысы өз кезегінде шабуыл туралы хабарға таңданыс білдіріп, соққылардың Иран аумағынан жасалғаны жөнінде қолында ешқандай мәлімет жоқ екенін айтты.
Сондай-ақ Аракчи Иран үкіметі мен Күрдістан аймақтық үкіметі арасындағы берік әрі жақсы қарым-қатынасты ескерсек, «мұндай әрекеттерді ешбір себеппен ақтауға болмайтынын» атап өтті.
Иран СІМ де болған оқиғаны айыптады.
IRNA агенттігінің хабарлауынша, Иран СІМ-нің ресми өкілі Исмаил Багаи бұл оқиғаны «қырағылық пен жіті назар аударуды қажет ететін аса күмәнді жағдай» деп атады.
«Ол сондай-ақ барлық тарап Иран мен Ирак арасындағы бауырластық қарым-қатынасты бұзуды көздейтін дұшпандардың арам пиғылына жол бермеу үшін бірлесіп әрекет етуі керектігін атап өтті», – делінген IRNA хабарламасында.
