Дубай. 1 мамыр. ИНТЕРФАКС – Иран билігі әрқашан диалогқа дайын, алайда келіссөздерді тек ұтымды ұстанымдар тұрғысынан жүргізудің маңызы бар. Бұл туралы жұма күні Иран сот билігінің басшысы Голям Хоссейн Мохсени-Эджеи мәлімдеді.
«Иран Ислам Республикасы келіссөздерден ешқашан қашқан емес. Біз қисын мен парасатқа негізделген кез келген келіссөздерді құптаймыз. Бірақ бізге жасалатын қысым мен таңылған шарттарды қабылдамаймыз», — деп келтіреді оның сөзін Press TV телеарнасы.
Мохсени-Эджеидің айтуынша, егер Иранның қарсыластары өз мақсаттарына қоқан-лоқы көрсету немесе ұрыс алаңында қол жеткізе алмаса, келіссөз үстелінде де одан нәтиже шықпайды. Сондай-ақ, ол Иран билігі АҚШ пен Израильдің Иранға жасаған шабылына байланысты халықаралық деңгейдегі құқықтық іс-қимылдарды жалғастыратынын, бұл қадамға жауапты тұлғаларды сотқа тартып, өтемақы өндіруді көздеп отырғанын айтты.
Өткен аптаның соңында АҚШ Президенті Дональд Трамп Иранмен бетпе-бет келіссөздерге бару көп уақыт пен қаражатты талап ететінін, сондықтан телефон арқылы байланыс орнатқанды жөн көретінін мәлімдеген болатын. Осы өткен демалыс күндері Исламабадта өтеді деп күтілген Вашингтон мен Тегеран өкілдерінің бетпе-бет келіссөздерінің кезекті раунды өтпей қалды.
28 сәуірде The New York Times газеті Ақ үйдің ахуалдық орталығындағы талқылаулар барысымен таныс бірнеше дереккөзге сілтеме жасай отырып, Трамптың Иран ұсынысын қабылдамайтынын хабарлады. Иран тарапы Ормуз бұғазын ашуды көздегенімен, Тегеранның ядролық бағдарламасы туралы мәселені кейінгі келіссөздерге қалдыруды ұсынған. Кейінірек Трамп Иранмен келіссөздердің нақты мәртебесі туралы өзінен және тағы бірнеше адамнан басқа ешкім хабардар емес екеніне сендірді.
