Варшава, 6 тамыз. ИНТЕРФАКС – Польша Республикасының жаңадан сайланған президенті Кароль Навроцкийдің ант беру рәсімі сәрсенбі күні Варшава қаласында өтеді. Салтанатты рәсім барысында президенттің антын парламент спикері – Сейм маршалы Шимон Холовня қабылдайды.
Кароль Навроцкий 1 маусымда өткен президент сайлауының екінші кезеңінде 50,89% дауыс жинап, жеңіске жеткен болатын. Оның қарсыласы – Варшава мэрі, қазіргі премьер-министр Дональд Туск басқаратын «Азаматтық платформа» партиясының өкілі Рафал Тшасковский 49,11% дауысқа ие болды.
Сайлаудан кейін Дональд Туск өз үкіметіне сенім вотумын алу үшін парламентке жүгініп, 460 депутаттың 243-і қолдап дауыс берді. Соның арқасында министрлер кабинеті жұмысын жалғастыру мүмкіндігін сақтап қалды.
Кароль Навроцкий бұған дейін Польшаның Ұлттық жады институтын басқарған. Президенттік сайлауға тәуелсіз кандидат ретінде қатысқанымен, оны консервативті «Құқық пен әділет» партиясы қолдады. Ол бірқатар жанжалдарға байланысты сынға ұшыраған. Соның ішінде қарт азаматтан пәтер құқығын иемденуге қатысты алаяқтық фактісі бойынша қылмыстық тергеу жүргізілген. Өз кезегінде Навроцкий бұл әрекетті тек ізгі ниетпен жасағанын мәлімдеген.
2024 жылы Ресей Ішкі істер министрлігі Навроцкийді Кеңес армиясы ескерткіштерін бұзуға байланысты қылмыстық айыптаулар негізінде іздеу жариялаған болатын.
Навроцкий Ресейге қатысты бірнеше мәрте қатаң мәлімдемелер жасаған. Атап айтқанда, биыл наурызда ол Мәскеумен дипломатиялық қатынасты үзу идеясын қолдайтынын жеткізген.
