Астана. 18 тамыз. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Төтенше жағдайлар министрі Шыңғыс Әріновтің ведомство жұмысының нәтижелері, азаматтық қорғау жүйесін жаңғырту барысы және алдағы кезеңге арналған жоспарлар туралы есебін тыңдады, деп хабарлады Мемлекет басшысының баспасөз қызметі.
Шыңғыс Әрінов құтқару бөлімшелерінің желісін кеңейту, жаңа әмбебап құтқару құрылымдарын, авиациялық және теңіз жасақтарын құру жұмыстары туралы баяндады. Атап айтқанда, «Ауыл құтқарушылары» бағдарламасы аясында 237 ерікті өрт сөндіру бекеті салынып, олар 700-ге жуық елді мекеннің қауіпсіздігін қамтамасыз етіп отырғанын жеткізді.
Министрдің айтуынша, халықты төтенше жағдайлар туралы жедел әрі жаппай хабардар ету жүйесі жетілдіріліп, Ахуалдық орталықтың мүмкіндіктері кеңейтіліп жатыр. Сондай-ақ табиғи өрттерді ерте анықтау жүйелері енгізілуде.
Соңғы екі жылда ТЖМ бөлімшелеріне 1,4 мыңнан астам техника, авиация құралдары, заманауи құтқару жабдықтары, ұшқышсыз ұшу аппараттары мен байланыс құралдары берілді. Соның арқасында ел аумағындағы төтенше жағдайларға жедел ден қою мүмкіндігі едәуір артты. Сонымен қатар министрлік бөлімшелерін жаңарту жұмыстары жүргізіліп жатыр.
Шыңғыс Әрінов ведомство қызметкерлерін әлеуметтік қолдау шаралары жөнінде де баяндады. Қызметкерлерге тұрғын үй төлемдері қарастырылған. Бұдан бөлек, ТЖМ мамандарына арналған арнайы тұрғын үй кластері жобасы жүзеге асырылуда. Жоба өрт сөндіру бөлімдері мен құтқару базаларының маңынан қажетті инфрақұрылымы бар тұрғын үйлер салуды көздейді.
Кездесу қорытындысында Қасым-Жомарт Тоқаев министрліктің азаматтық қорғау жүйесін жетілдіру бағытындағы жұмысына оң баға берді.
«Мемлекет басшысы жергілікті атқарушы органдармен бірлесіп, аудандық және ауылдық құтқару бөлімшелерінің материалдық-техникалық базасын нығайту, заманауи технологияларды енгізу және өрт қауіпсіздігін күшейту жұмыстарын жалғастыруды тапсырды», – деп Президент баспасөз қызметі хабарлады.
