Астана. 17 қаңтар. ИНТЕРФАКС-ҚАЗАҚСТАН – Қазақстан Республикасының Қорғаныс министрінің бірінші орынбасары – Қарулы күштер Бас штабының бастығы қызметіне Қаныш Әбубәкіров тағайындалды. Бұл туралы сенбі күні Мемлекет басшысының баспасөз қызметі хабарлады.
«Мемлекет басшысының өкімімен Әбубәкіров Қаныш Асанханұлы Қазақстан Республикасының Қорғаныс министрінің бірінші орынбасары – Қазақстан Республикасы Қарулы күштерінің Бас штабының бастығы болып тағайындалды, ол бұрын атқарған қызметінен босатылды», – делінген хабарламада.
Қазір 48 жастағы генерал-майор Қаныш Әбубәкіров 2024 жылғы қаңтардан бастап қорғаныс ведомствосы басшысының тыл және әскери инфрақұрылым жөніндегі орынбасары қызметін атқарған. Бұған дейін ол Құрлық әскерлерінің бас қолбасшысының бірінші орынбасары – Бас штаб бастығы болған.
Сондай-ақ Мемлекет басшысының өзге өкімімен Қорғаныс министрінің бірінші орынбасары – Қарулы күштер Бас штабының бастығы қызметінен Сұлтан Камалетдинов босатылды.
