АСТАНА. 9 тамыз. – Қазақстан Президенті Қасым-Жомарт Тоқаев Вашингтонда қол қойылған Әзербайжан мен Армения арасындағы бейбітшілік жөніндегі келісімді тарихи тұрғыдан маңызды жетістік деп санайды. Бұл туралы Мемлекет басшысының баспасөз хатшысы Руслан Желдібай хабарлады.
«Аталған құжат екі мемлекет арасындағы ұзаққа созылған қарулы қақтығысты тоқтатып, олардың арасында берік бейбітшілікке негізделген дипломатиялық қатынастар орнатуға және ынтымақтастықты дамытуға жол ашты», – делінген хабарламада.
Мемлекет басшысының пікірінше, Әзербайжан мен Армения арасындағы бірегей келісім АҚШ Президенті Дональд Трамптың белсенді әрі тиімді арағайындық миссиясының нәтижесінде мүмкін болды. Ол екі елдің көшбасшыларын толық саяси ерік-жігер мен стратегиялық алысты көздеу танытуға көндіре алды.
Сонымен бірге Қасым-Жомарт Тоқаев Қазақстан да осы маңызды уағдаластықтардың орындалуына өз үлесін қосқанын атап өтті. Алматы қаласы бейбіт келісімнің негізгі параметрлерін талқылау мақсатында сыртқы істер министрлері деңгейіндегі келіссөз алаңы ретінде ұсынылды. Министрлік деңгейдегі кездесу сонда өткен.
8 тамызда Вашингтонда Армения Сыртқы істер министрі Арарат Мирзоян мен Әзербайжан Сыртқы істер министрі Джейхун Байрамов, сондай-ақ Армения, Әзербайжан және АҚШ басшыларының қатысуымен «Армения Республикасы мен Әзербайжан Республикасы арасындағы бейбітшілік пен мемлекетаралық қатынастарды орнату туралы» келісімге параф қою рәсімі өтті. Парафталған келісім мәтіні 11 тамыз кешінде жарияланады.
