Астана. 25 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Common History Destiny. Designed and Made in Both China And Kazakhstan бағдарламасын іске қосуды ұсынды, деп хабарлады Мемлекет басшысының баспасөз қызметі.
«Қазақстан мен Қытайдың Common History Destiny. Designed and Made in Both China And Kazakhstan бағдарламасын іске қосуды ұсынамын. Үкімет қытайлық серіктестермен бірлесіп, келешегі зор жобаларды іріктеп, оларды жүзеге асыруға жедел кірісуі қажет», – деді Тоқаев жұма күні Алматыда өткен «Қазақстан – Қытай» инвестициялық форумында.
Президент өнеркәсіп саласындағы ынтымақтастықтың маңызын атап өтті. Қазіргі уақытта бұл бағытта жалпы құны 62 млрд доллардан асатын 260 ірі бірлескен жоба бар.
«Қытай кәсіпорындарының қатысуымен Алматыда автомобиль кластері дамып келеді, Қарағанды облысында кремний өндірісі жолға қойылуда. Металлургия, мұнай-газ химиясы және энергия жинақтау жүйелері салаларында жобалар жүзеге асырылып жатыр. Өнімділігі төмен мұнай ұңғымаларының жұмысын оңтайландыру және қалпына келтіру жөніндегі алғашқы жобалар қолға алынды. Ақтөбе облысында қытайлық Jinyi Holding Group компаниясымен бірлесіп, халықаралық стандарттарға сай жұмыс істейтін арнайы индустриялық аймақ пилоттық режимде құрылып жатыр», – деді Президент.
Тоқаевтың айтуынша, агроөнеркәсіп кешеніндегі келісімдер де нақты жобалармен толықтырылып келеді.
«Атап айтқанда, Lihua, Fufeng және Dalian Hesheng Holdings компанияларының тігінен интеграцияланған мақта-тоқыма кластерін құру, жүгері мен астықты терең өңдеу жөніндегі ірі жобаларын ерекше атап өткім келеді. Бұл серіктестігімізді жаңа деңгейге көтеруге жақсы негіз болады. Яғни жекелеген инвестициялық жобаларды жүзеге асырудан толыққанды өндірістік экожүйелер құруға көшіп, Орталық Азия, Еуразиялық экономикалық одақ, Оңтүстік Кавказ және Еуропа елдерінің нарықтарына бірлесіп шығуға мүмкіндік береді», – деді Мемлекет басшысы.
Президент тау-кен металлургия кешеніндегі ынтымақтастықты тағы бір басым бағыт ретінде атады. Оның айтуынша, Қазақстанда уран, мыс, алтын, көмір, аса маңызды минералдар мен сирек кездесетін металдардың мол қоры бар.
Мемлекет басшысы цифрландыру мәселесіне де ерекше тоқталды. Ол Қазақстанның әлемдегі жетекші технологиялық орталықтардың барлығымен ынтымақтастық орнатуға ашық екенін атап өтті.
«Биыл Қазақстан Жасанды интеллект саласындағы ынтымақтастық жөніндегі дүниежүзілік ұйымды құрушы елдердің қатарына қосылып, технологиялық ынтымақтастықтың жаңа халықаралық алаңына мүше болды. Бұл бастаманы ҚХР төрағасы Си Цзиньпин ұсынған болатын», – деді Тоқаев.
Президент Қазақстанның технологиялар трансферіне, бірлескен инженерлік және ғылыми-зерттеу орталықтарын құруға мүдделі екенін айтты.
«Біз жаңа буын мамандарын даярлауға баса мән береміз. Елордамызда алғашқы Қазақстан-Қытай жасанды интеллект мектебін ашуды жоспарлап отырмыз. Alatau City – технология саласындағы нәтижелі серіктестігіміздің жарқын көрінісі. Бұл ауқымды жоба Қытай, Орталық Азия және Еуропа арасындағы іскерлік байланыстың ірі орталығына айналуға тиіс», – деді Мемлекет басшысы.
