Астана. 9 тамыз. ИНТЕРФАКС-ҚАЗАҚСТАН – Қазақстан президенті Қасым-Жомарт Тоқаев Сингапур президенті Тарман Шанмугаратнамға Тәуелсіздік күніне орай құттықтау жеделхатын жолдады. Бұл туралы жексенбі күні Ақорданың баспасөз қызметі хабарлады.
Мемлекет басшысы бұл мерекенің Сингапур халқы үшін ұлттық бірліктің, егемендік пен елдің орнықты дамуының нышаны ретінде айрықша маңызға ие екенін атап өтті.
Қасым-Жомарт Тоқаев достық пен өзара түсіністікке негізделген Қазақстан мен Сингапур арасындағы көпжақты ынтымақтастық екі ел халқының игілігі жолында алдағы уақытта да қарқынды дами беретініне сенім білдірді.
Президент Тарман Шанмугаратнамға жауапты қызметінде табыс, ал достас Сингапур халқына бақ-береке мен өркендеу тіледі.
