Вашингтон. 21 қыркүйек. ИНТЕРФАКС. АҚШ Президенті Дональд Трамп Еуропа елдерін Ресейден мұнай сатып алуды тоқтатуға тағы да үндеді. Оның пайымынша, ресейлік мұнайдың нарықтағы бағасының төмендеуі Украинадағы қақтығысты тоқтатуға ықпал етуі мүмкін.
«Еуропалықтар Ресейден мұнай сатып алып жатыр, бірақ бұлай болмауы керек, солай ма?» – деді Трамп сенбі күні Вирджиния штатындағы Маунт-Вернон қаласында өткен кешкі аста.
Ол сол жиында қатысып отырған АҚШ-тың НАТО жанындағы тұрақты өкілі Мэт Уитакерге жүгініп, Еуропаға қосымша қысым жасауды тапсырды.
«Олар Ресейден мұнай сатып алуды доғару керек (…), Мэт, оларға осыны айтып қой. Мэт енді мұндайға жол бермейді», – деді Трамп.
АҚШ президенті елдегі мұнай өндіру көлемін арттыратынын айтып, бұл қадам нарықтағы бағаны төмендетуге ықпал ететінін жеткізді. Оның айтуынша, мұнай бағасының аз да болса арзандауы Украинаның айналасындағы жағдайдың реттелуіне әсер етуі мүмкін.
Трамп бұған дейін де ресейлік мұнай сатып алушыларға қарсы санкцияны қатаңдатуға дайын екенін мәлімдеген болатын. Ол бұл бағытта алдымен Еуропаның нақты қадамдарға баруын талап еткен.
Ал Уитакер бұған дейін Fox News арнасына берген сұхбатында: «Егер Еуропа өзі Ресейден мұнай сатып алуды жалғастыра беретін болса, онда АҚШ-тың бірінші болып санкция енгізуін талап етуге ешқандай құқығы жоқ», – деп мәлімдеген.
