Вашингтон. 25 тамыз. ИНТЕРФАКС – АҚШ президенті Дональд Трамп Оттаваның мәлімдемелерін жоққа шығарып, Канадада француз тілінің қолданылуына қарсы емес екенін айтты. Француз тілі ағылшын тілімен қатар Канададағы ресми тілдердің бірі саналады.
«Мен канадалықтардың француз тілінде сөйлеу құқығына ешқашан кедергі келтірмеймін! Мұндай ақылға қонбайтын нәрсе ойыма да келген емес», – деп жазды Трамп сейсенбі күні Truth Social әлеуметтік желісінде.
Трамптың айтуынша, Канада премьер-министрі Марк Карни бұл мәселені Квебек тұрғындарының саяси қолдауына қайта ие болу үшін әдейі көтерген.
АҚШ президенті франкофон канадалықтарға жылы қарайтынын да атап өтті.
АҚШ пен Канада арасындағы қарым-қатынас тамыз айының басында тараптар жаңа сауда шарттары бойынша мәмілеге келе алмағаннан кейін шиеленісе түсті. Сенбі күні жалпы құны 20 млрд доллар болатын бірқатар канадалық тауарға, соның ішінде сыра мен ірімшікке АҚШ-тың 50 пайыздық бажы күшіне енді.
Бұған дейін Марк Карни АҚШ өкілдері Канадаға экспортталатын тауарлардың қаптамасына француз тілінде ақпарат жазу талабын саудадағы кедергілердің бірі ретінде қарастыратынын мәлімдеген. Карнидің сөзінше, Вашингтон ұсынған сауда келісімі қабылданса, елдегі француз тілі мен франкофон мәдениетінің жағдайына кері әсер етуі мүмкін.
CNN мәліметінше, АҚШ тарапы тауарларға француз тілінде міндетті түрде таңбалау талабын алып тастауды ұсынған. Өйткені бұл талапты сақтау өндірушілерге Канада нарығына арналған қаптаманы бөлек дайындап, қосымша шығын шығаруға тура келеді.
Француз тілінің мәртебесі тұрғындарының басым бөлігі осы тілде сөйлейтін Квебек провинциясы үшін ерекше маңызға ие. Квебек заңнамасына сәйкес, тауар қаптамасында оның атауы француз тілінде көрсетілуге тиіс.
