АСТАНА. 6 қаңтар. ИНТЕРФАКС-ҚАЗАҚСТАН – Қазақстан Республикасының Мемлекеттік кеңесшісі Ерлан Қарин Президент Қасым-Жомарт Тоқаевпен өткен жұмыс кеңесінде парламенттік реформа жөніндегі жұмыс тобы қызметінің аралық қорытындылары туралы ақпарат берді. Бұл туралы Мемлекет басшысының баспасөз қызметі хабарлады.
«e-Otinish мемлекеттік платформасы мен eGov сервисінде іске қосылған “Парламенттік реформа” арнайы бөлімшесі жұмысын бастаған күннен бері шамамен 500 ұсыныс келіп түсті. Азаматтардан, сарапшылар мен қоғамдық ұйымдардан түскен ұсыныстар мен бастамаларды жинақтау және талдау жұмыстары жалғасуда», – делінген сейсенбі күні таратылған ақпаратта.
Ерлан Қариннің айтуынша, парламенттік реформа жөніндегі жұмыс тобының өткен отырыстарында болашақ бірпалаталы парламентті қалыптастыру және оның заң шығару функцияларын іске асыру мәселелері талқыланған.
«2026 жылғы 9 қаңтарға кезекті жұмыс тобы отырысын өткізу жоспарланып отыр. Онда реформаның өзге бағыттары бойынша ұсыныстар жан-жақты қаралатын болады», – деп көрсетілген хабарламада.
Сонымен қатар Мемлекеттік кеңесші Президентке желтоқсан айында өткен Ұлттық құрылтайдың жұмыс секцияларының отырыстарының қорытындылары және алдағы бесінші құрылтай отырысына дайындық барысы туралы да баяндады.
«Парламентті реформалаудың саяси жүйені трансформациялау үдерісіндегі айрықша рөлін және алда тұрған өзгерістердің ауқымын атап өткен Қасым-Жомарт Тоқаев түскен барлық бастамаларды жан-жақты қарауды және олардың негізінде конституциялық реформаға қатысты базалық тәсілдерді әзірлеуді тапсырды», – делінген хабарламада.
Президент Қазақстан халқына 8 қыркүйекте жолдаған Жолдауында екіпалаталы парламенттің орнына бірпалаталы парламент құру мүмкіндігін зерделеуді және бұл мәселені референдумға шығаруды ұсынған болатын.
«Реформаның ерекшелігін ескере отырып, кең көлемді талқылауға кемінде бір жыл қажет деп санаймын. Осыдан кейін 2027 жылы жалпыхалықтық референдум өткізіп, Конституцияға тиісті өзгерістер енгізуге болады», – деген еді Мемлекет басшысы. Ол бұл реформаның азаматтық секторда, сараптамалық ортада және қазіргі парламентте жан-жақты талқылануы тиіс екенін атап өтті.
Қазан айының басында Президент парламенттік реформа жөніндегі жұмыс тобын құру туралы Жарлыққа қол қойған. Оның құрамына Мәжіліс пен Сенат депутаттары, Қазақстан халқы Ассамблеясының өкілдері, саяси партиялар фракцияларының жетекшілері, ғылыми институт басшылары, заңгер-ғалымдар, сондай-ақ сарапшылар мен Ұлттық құрылтай мүшелері енген.
Қазіргі Қазақстан Парламенті 1995 жылдан бері екі палатадан – Сенат пен Мәжілістен тұрады.
