Мәскеу. 16 маусым. ИНТЕРФАКС – Ұлыбритания Ресейдің төрт кредиттік ұйымына қарсы санкциялар енгізді. Елдің Қаржылық санкцияларды жүзеге асыру басқармасының (OFSI) хабарлауынша, шектеулер Еврофинанс Моснарбанкке, Яндекс банкке, Вайлдберриз банкке (ВБ-банк) және «Вятич» банкіне қатысты қолданылды.
Сонымен қатар Ұлыбританияның санкциялық тізіміне ресейлік екі сақтандыру компаниясы – «Росгосстрах» пен «Баланс страхование» да енгізілді.
ВБ-банк RWB тобының (Wildberries & Russ біріккен компаниясы) еншілес банкі болып табылады. Маркетплейспен стратегиялық әріптестік аясында осы жаздың соңына дейін ВТБ банкі ВБ-банктің капиталына қатысып, 5 пайыздық үлес сатып алады деп күтілуде. 2026 жылдың бірінші тоқсанының қорытындысы бойынша банк активтер көлемі жөнінен «Интерфакс-100» рейтингінде 49-орында тұр.
ВБ-банк баспасөз қызметінің мәліметінше, қаржы ұйымы қалыпты режимде жұмысын жалғастыруда.
«Банк әрдайым Ресей Федерациясының ішкі нарығына бағдарланған. Банк пен маркетплейстің клиенттері мен серіктестері үшін қызмет көрсету тәртібінде ешқандай өзгеріс болмайды. Жеке және заңды тұлғалар барлық операцияларды, соның ішінде ақша аударымдарын, банк карталарын пайдалануды, депозиттер бойынша сыйақы алуды, несие рәсімдеуді және есеп айырысу шоттарын жүргізуді бұрынғыдай жүзеге асыра алады», – деп мәлімдеді банк өкілдері.
Ресей-Венесуэла капиталы негізінде құрылған Еврофинанс Моснарбанк «Ростех» мемлекеттік корпорациясының «РТ-Финанс» холдингінің құрамына кіреді. 2022 жылғы мәлімет бойынша банктің 50 пайыз минус 2 акциясы Венесуэланың Fonden даму қорына тиесілі болған. Банк активтер көлемі бойынша «Интерфакс-100» рейтингінде 94-орында орналасқан.
Яндекс банк 2026 жылдың бірінші тоқсанының қорытындысы бойынша «Интерфакс-100» рейтингінде 31-орынға ие. «Яндекс» компаниясы банкті 2021 жылдың шілде айының ортасында 1,1 млрд рубльге сатып алған болатын. Мәміле нәтижесінде компания қаржылық технологиялар бағытын дамытуға және осы салада жаңа өнімдер ұсынуға мүмкіндік беретін банктік лицензияға ие болды.
«Вятич» банкі кәсіпкер Малик Гайсиннің бақылауында болған. Кейін оның активтері Бас прокуратураның талабы бойынша Ресей мемлекетінің пайдасына тәркіленді. 2026 жылдың бірінші тоқсанының қорытындысы бойынша банк «Интерфакс-100» рейтингінде 186-орында тұр.
«Росгосстрах» ВТБ тобының құрамына кіреді. Қазіргі уақытта ВТБ сақтандыру компаниясын сату жөнінде келіссөздер жүргізіп жатыр. Мәміле 2026 жылдың соңына дейін аяқталуы мүмкін.
