Вашингтон. 25 тамыз. ИНТЕРФАКС – Иран маңында әскери міндеттерін орындап жүрген АҚШ Әскери-теңіз күштерінің құрамында қазір кемінде 20 жауынгерлік кеме бар. Бұл туралы АҚШ Әскери-теңіз институтының ақпарат қызметі хабарлады.
Оның мәліметінше, Иран жағалауынан оңтүстік-шығысқа қарай Араб теңізінде USS George Bush және USS George Washington атты екі әуе тасымалдаушы кеме кезекшілік атқарып жүр. USS George Washington аймаққа өткен аптада келіп, АҚШ-тағы базасына қайтқан USS Abraham Lincoln кемесін алмастырды. Екі кемеде жалпы саны 100-ден астам жойғыш ұшақ, радиоэлектрондық күреске және әуедегі жағдайды алыстан бақылауға арналған ұшақтар бар.
Әуе тасымалдаушы кемелермен бірге аймақта, соның ішінде Ормуз бұғазының шығысындағы Оман шығанағында бір крейсер мен 12 эсминец орналасқан. Олар 1,6 мың шақырымға дейін ұшатын Tomahawk қанатты зымырандарымен жабдықталған. Тағы екі зымырандық эсминец Қызыл теңіз бен Үнді мұхитында жүр.
Оман шығанағында үш ірі десанттық кемеден тұратын амфибиялық топ та бар. Олардың бортында шамамен 2,2 мың әскери қызметшіден құралған теңіз жаяу әскерінің 11-экспедициялық батальоны орналасқан. Топ құрамында бұдан бөлек тік ұшып-қона алатын F-35 жойғыштарының екі эскадрильясы, конвертопландар, соққы беретін және көлік тікұшақтары, сондай-ақ десанттық катерлер бар.
Иран маңындағы АҚШ әскери-теңіз күштерінің құрамына экспедициялық теңіз базасы ретінде пайдаланылатын USS Miguel Keith кемесі де кіреді.
АҚШ әскери кемелері аймақта кезекшілік атқарумен қатар Иран порттарына енгізілген теңіз блокадасын қамтамасыз етуге де жұмылдырылған.
