ҚР Туризм және спорт министрлігінің мәліметінше, Мемлекет басшысы теннисші Елена Рыбакинаны әлемнің бірінші ракеткасы атануымен құттықтады. «WTA рейтингінде бірінші орынға көтерілуіңіз – айрықша талантыңыздың, орасан еңбегіңіз бен өз күшіңізге деген нық сеніміңіздің арқасында бағындырған биігіңіз. Осы тарихи жетістігіңізбен Қазақстан спортының мерейін асырып, әлемдік теннис тарихында өз есіміңізді қалдырдыңыз. Сіздің спорттағы жолыңыз еліміздегі мыңдаған жас спортшыға және әлемнің түкпір-түкпіріндегі миллиондаған теннис жанкүйеріне үлгі. Сондай-ақ кортта да, күнделікті өмірде де түрлі адамдармен қарым-қатынас кезінде жоғары мәдениет танытатыныңызды ерекше атап өткім келеді. Бұл Сіздің парасат-пайымыңыз бен тәрбиеңізді айқын көрсетеді», – делінген құттықтауда. Қасым-Жомарт Тоқаев Елена Рыбакинаға жеңіске деген жігерін жоғалтпай, жаңа белестерді бағындыра беруіне тілектестік білдірді.
Еуразия24 пікірі:
Қасым-Жомарт Кемелұлы қазақстандық спортшыларды айтулы жетістіктерімен үнемі құттықтап келеді. 2024 жылы сәуірде де Елена Рыбакинаның Штутгарттағы турнирде жеңіске жетуіне орай құттықтау жолдаған еді. Алайда жоғары деңгейде мойындалған спортшының өзі әлеуметтік желідегі сыннан тыс қалмайтынын кейінгі жағдай көрсетті. Осыдан екі жыл бұрын, 2024 жылдың жазында Рыбакина жедел бронхитке байланысты Париж Олимпиадасына қатысудан бас тартты. Сол кезде қазақстандық жанкүйерлердің бір бөлігі көңілі қалғанын білдірумен шектелмей, спортшының елге деген жанашырлығына күмән келтірді. Әлеуметтік желіде оны «еліміздің патриоты емес» деп айыптағандар да, тіпті ұлттық құрама сапынан шығаруды талап еткендер де болды. Рыбакинаның өзі Олимпиадаға дәрігерлердің қатаң тыйымына байланысты қатыса алмайтынын түсіндірді. Кейін қазақстандық жанкүйерлерге арнайы үндеу жолдап, Парижде өнер көрсете алмағаны үшін кешірім сұрады. Арада екі жыл өтті. Бүгінде Елена Рыбакина – әлемнің бірінші ракеткасы. Енді кезінде оны ұлттық құрамадан шығаруды талап еткендер не айтар екен?
