Вашингтон. 1 тамыз. INTERFAX – АҚШ президенті Дональд Трамп бірқатар елдерге қатысты енгізген жаңа кедендік баж салығы 7 тамыз, бейсенбі күні күшіне енеді. Бұл туралы CNN телеарнасы хабарлады.
Телеарнаның мәліметінше, бастапқыда жаңа тарифтік режим 1 тамызда күшіне енеді деп жоспарланған. Алайда, кеден және шекара қызметіне өзгерістерді енгізу үшін қосымша уақыт қажет болғандықтан, бұл мерзім 7 тамызға шегерілді.
Бейсенбі күні кешке Трамп 68 мемлекет пен Еуропалық одаққа қатысты жаңа тарифтерді бекіткен жарлыққа қол қойды. Құжатқа сәйкес, мысалы, Швейцариядан келетін импорттық тауарларға баж салығы 31 пайыздан 39 пайызға дейін ұлғайтылады. Ал Лихтенштейн үшін бұл көрсеткіш, керісінше, 37 пайыздан 15 пайызға дейін төмендетілді.
Аталған жарлықта Трамп Еуропалық одақ, Жапония, Оңтүстік Корея, Ұлыбритания және Филиппин сынды негізгі сауда серіктестерімен жасалған келісімдерді заңдық тұрғыдан бекітті.
Жарлықта аталған мемлекеттерден бөлек елдер үшін базалық баж мөлшерлемесі 10 пайыз көлемінде белгіленген.
Айта кетейік, 9 сәуірде Трамп 75-тен астам елмен диалог жүргізу туралы өтініштерге байланысты импорттық баж салығын арттыру жөніндегі шешімнің орындалуын 90 күнге тоқтатқан еді. Бұл мерзім 9 шілдеге дейін белгіленіп, кейін 1 тамызға дейін ұзартылған болатын.
