Inform.kz хабарлағандай, Kaspi.kz компаниясы Қазақстан Республикасы Ұлттық банкінің Ұлттық төлем корпорациясымен бірыңғай QR жүйесіне қосылу жөнінде келісімшартқа қол қойды. Бұл қадам — еліміздегі төлем инфрақұрылымын жетілдіруге бағытталған мақсатты модель аясында жүзеге асырылып отыр. Kaspi.kz компаниясының басшысы және тең құрылтайшысы Михаил Ломтадзе бұл жөнінде былай деп пікір білдірді: «Биыл біз Ұлттық банкпен тығыз әрі белсенді жұмыс істедік, әсіресе операциялар қауіпсіздігін қамтамасыз ету бағытында. Бірыңғай QR жүйесіне қосылу – Қазақстанда кең ауқымды, заманауи әрі қауіпсіз төлем инфрақұрылымын қалыптастырудағы маңызды қадам. Біздің қымбатты клиенттеріміз үшін алдағы уақытта кез келген банктің QR коды арқылы төлем жасау мүмкіндігі пайда болады. Бірыңғай QR жүйесі арқылы төлемдер Ұлттық банктің орталық инфрақұрылымы арқылы жүргізіледі және барлық банктер бұл жүйеге тең дәрежеде қосылады. Целевтік модель клиенттер мен компанияларды алаяқтық қауіптерінен қорғаудың ең жоғары деңгейін қамтамасыз етеді».
Евразия24 пікірі:
2025 жылдың мамырында өткен брифингте Ұлттық банк төрағасының кеңесшісі Бинұр Жаленов бірыңғай QR жүйесі тамызда іске қосылады деп мәлімдеген болатын . Іс жүзінде бұл мерзім сәл кейінге шегерілді, алайда маңыздысы — жүйе ақыры ресми түрде іске қосылды. 2025 жылғы 13 қарашада Алматыда өткен Central Asia Fintech Summit шарасында Ұлттық банк төрағасы Тимур Сүлейменовтің қатысуымен бірыңғай QR жүйесі ресми түрде жұмысын бастады. Алғаш болып жүйеге Freedom Bank, Банк ЦентрКредит және Home Credit Bank қосылды. Кейіннен оларға Halyk Bank, Altyn Bank және Bank RBK қосылды. Сол саммитте Kaspi.kz компаниясының жүйеге ресми қосылғаны жөнінде Ұлттық банк төрағасы жеке өзі хабарлады. Жаңа QR моделі барлық банктер үшін міндетті түрде енгізілмек — бұл талап «Банктер және банк қызметі туралы» жаңартылған заңда бекітілген. Цифрлық банкингтің бұл технологиялық жаңаруы – тұтынушылар үшін төлем жасауды жеңілдетіп, қауіпсіздікті арттырып, ұлттық инфрақұрылымға сенімділік береді.
