Астана. 9 желтоқсан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Ресей Федерациясының Қазақстандағы Елшісі Алексей Бородавкинді қабылдады. Бұл туралы сейсенбі күні мемлекет басшысының баспасөз қызметі хабарлады.
Кездесу барысында мемлекет басшысы бірлескен күш-жігердің нәтижесінде Қазақстан мен Ресей арасындағы көпқырлы ынтымақтастық барлық бағыттар бойынша табысты дамып жатқанын атап өтті. Сондай-ақ саяси диалогтың бұрын-соңды болмаған жоғары динамикаға ие болғаны айтылды.
Қасым-Жомарт Тоқаев өзінің жуырда Ресей Федерациясына жасаған мемлекеттік сапарының мазмұнды нәтижелеріне және Ресей Президенті Владимир Путинмен өткен келіссөздердің тиімділігіне ерекше назар аударды. Баспасөз қызметінің мәліметінше, аталған келіссөздер екі ел арасындағы жан-жақты стратегиялық әріптестік пен одақтастықты одан әрі дамытуға елеулі серпін берген.
Қазақстан Президентінің Ресейге мемлекеттік сапары 11–12 қараша күндері өтті.
