Бейжің. 5 қазан. INTERFAX – АҚШ-тың аймақтағы әскери күшін арттыруы Корей Халық Демократиялық Республикасын (КХДР) өз қару-жарағы мен әскери техникасын одан әрі жетілдіруге итермелейді. Бұл туралы Солтүстік Корея басшысы Ким Чен Ын Пхеньянда өткен қару-жарақ көрмесінің ашылу рәсімінде мәлімдеді, деп хабарлады КХДР-дың Орталық телеграф агенттігі (ЦТАК).
«Егер АҚШ аймақ елдерінің қауіпсіздікке қатысты алаңдаушылығын елемей, әскери әлеуетін қауіпті түрде арттыруды жалғастыра берсе, мұндай жағдай бізді жаңа қатерлерді жою және күштер теңгерімін сақтау мақсатында сәйкес әскери-техникалық шараларды белсенді түрде іске асыруға мәжбүрлейді», – деді Ким Чен Ын.
Ол сондай-ақ қазіргі қауіпсіздік жағдайы тұрақсыз екенін атап өтті:
«Біз тап болған қауіпсіздік ахуалының тұрақсыздығы бізге тыныштықта отыруға немесе жетістіктерге масаттануға мүмкіндік бермейді».
КХДР басшысының айтуынша, елдің «өте қуатты қару-жарақтары» әділетсіз қауіптерді тежеуге сенімділік береді және халықтың арманы мен идеалдарын жүзеге асыруға кепіл болады.
«Соғысты тежеу әлеуетін, оның өзегі – ядролық қарулы күштерді үздіксіз нығайту – біздің жеңісіміздің және КХДР-дағы тұрақты бейбітшіліктің кепілі», – деп атап өтті ол.
Ким Чен Ын алдағы уақытта КХДР-дың қорғаныс өнеркәсібі жаңа міндеттер мен мақсаттарға бағытталып, айтарлықтай өзгерістерге ұшырайтынын мәлімдеді:
«Жақында бәрі біздің қорғаныс техникасы алдында қандай жаңа міндеттер қойылатынын және оның келесі кезеңде қалай түбегейлі жаңаратынын білетін болады», – деді Солтүстік Корея көшбасшысы.
