АСТАНА. 4 қазан. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев «2017 жылғы 11 сәуірдегі Еуразиялық экономикалық одақтың Кеден кодексі туралы шартқа өзгерістер енгізу жөніндегі хаттаманы ратификациялау туралы» заңға қол қойды, деп хабарлады Мемлекет басшысының баспасөз қызметі.
Аталған хаттама 2023 жылғы 25 желтоқсанда Санкт-Петербургте қол қойылған болатын. Құжат үшінші елдердегі шетелдік интернет-сауда алаңдарынан жеке тұлғаларға халықаралық пошталық жөнелтілімдер арқылы жіберілетін тауарларды жеке пайдалануға арналған тауарлардан бөлек, электрондық сауда тауарларының жеке санатына бөлуге мүмкіндік береді. Қазіргі уақытта мұндай тауарлар жеке пайдалануға арналған тауарлар ретінде рәсімделеді.
Сондай-ақ хаттама «электрондық сауда операторы» деген жаңа ұғым енгізеді. Мұндай оператор жеке тұлғалардың интернет-алаңдар арқылы сатып алған тауарларын жеткізу логистикасын ұйымдастырып, онлайн-платформалармен және кеден органдарымен өзара іс-қимылды қамтамасыз етеді. Сонымен бірге ол электрондық сауда тауарларының кедендік декларациясын рәсімдеп, тауарларды сақтауды жүзеге асырады.
Құжат аясында жаңа кедендік құжат түрі – электрондық сауда декларациясы енгізіледі.
Бұған дейін Премьер-Министрдің орынбасары – Ұлттық экономика министрі Серік Жұманғарин түсіндіргендей, қазір шетелдік интернет-платформалардан алынған тауарлар жеке пайдалануға арналған тауарлар санатына жатады және тек бажсыз әкелу нормасы (200 еуро немесе 31 кг) асқан жағдайда ғана декларацияланады. Мұндай тауарлар ресми сауда айналымына кірмейтіндіктен, статистикаға енгізілмейді. Жаңа тәртіп электрондық сауда арқылы сатып алынған тауарлардың толық көлемін есепке алуға және нақты статистика қалыптастыруға мүмкіндік береді.
Жұманғарин атап өткендей, жаңа ережелер бойынша барлық тәуекелдерді операторлар өз мойнына алады – тауарды қайтару, декларацияны толтыру және басқа рәсімдер олардың жауапкершілігінде болады. Сонымен бірге сатып алушы да тауарды өз бетінше декларациялай алады.
Министр жаңа нормалар тұтынушы үшін тауардың құнын шамамен 2%-ға арттыруы мүмкін екенін жоққа шығармады.
«Қазір егер 200 еуро және 31 кг шегі асса, сіз 15% кедендік төлем төлейсіз. Жаңа тәртіп бойынша қосымша құн салығын (ҚҚС) сауда алаңы төлейді, ал сіз – 5% кедендік баж төлейсіз. Жалпы сомасы шамамен 17% болады. Айырмашылық – 2%», – деп түсіндірді Жұманғарин.
