Астана. 28 қазан. ИНТЕРФАКС-ҚАЗАҚСТАН – Қазақстан үкіметі 2027 жылғы қаңтардың соңына дейін «Алатау қаласының арнайы құқықтық режимі туралы» конституциялық заңға енгізілетін түзетулерді Құрылтайдың қарауына ұсынуы тиіс. Президент Қасым-Жомарт Тоқаев осындай тапсырма берді.
«Үкімет 2027 жылғы қаңтардың соңына дейін «Алатау қаласының арнайы құқықтық режимі туралы» конституциялық заңға тиісті түзетулерді Құрылтайдың қарауына енгізуі керек», – деді Тоқаев сәрсенбі күні Қазақстан халқына арнаған жыл сайынғы Жолдауында.
Президент инвестиция мен кәсіпкерлікке қолайлы орта қалыптастыруды көздейтін, қарқынды дамуға бағытталған Алатау қаласын салудың маңызын халықтың басым бөлігі түсінгенін атап өтті.
«Кез келген халықаралық юрисдикцияның ұзақ мерзімді тартымдылығының басты шарты – тиімді сот төрелігі. Сондықтан Алатауда сот төрелігінің жоғары сапасын қамтамасыз ететін сот жүйесін құру қажет. Ағылшынның жалпы құқық үлгісіне негізделген Инвестициялық сот коммерциялық істерді қарайды. Ал арнайы құқықтық режимге қатысты қалған мәселелердің барлығы Азаматтық соттың құзыретіне кіреді», – деді президент.
Алатау қаласы 2024 жылғы қаңтарда Алматы облысында құрылды. Қаланы дамыту мақсатында арнайы құқықтық режим туралы конституциялық заң қабылданды. Онда салықтық жеңілдіктер беру, инвесторларға «бір терезе» қағидаты бойынша қызмет көрсету және инновациялық әрі инвестициялық жобаларды жүзеге асыратын тәжірибелік алаң құру көзделген. Билік Алатауды болашақта бизнес, технология, логистика және туризм саласындағы халықаралық орталыққа айналдыруды жоспарлап отыр.
