Президент уранның мемлекеттік резервін құру мүмкіндігін қарастыруды ұсынды
Астана. 28 қазан. ИНТЕРФАКС-ҚАЗАҚСТАН – Қазақстандағы алғашқы «Балқаш» атом электр станциясының (АЭС) құрылысын 2027 жылы бастау қажет. Бұл туралы президент Қасым-Жомарт Тоқаев мәлімдеді.
«Келесі жылы «Балқаш» АЭС-інің құрылысын бастауға және «Мойынқұм» АЭС-інің құрылысын мүмкіндігінше тезірек қолға алу үшін кешенді ынтымақтастық туралы келісімге қол қоюға болады, тіпті мұны қажет деп санаймын», – деді Тоқаев сәрсенбі күні Қазақстан халқына арнаған жыл сайынғы Жолдауында.
Президент атом энергетикасының Қазақстан үшін айрықша маңызы бар екенін атап өтті.
«Жалпыхалықтық референдум нәтижесінде атом электр станциясын салу туралы дұрыс шешім қабылданды. Оның үстіне бір емес, бірнеше станция салу көзделіп отыр. Қазірдің өзінде оларды елу жылдан кейін және одан әрі уран шикізатымен қалай қамтамасыз ететінімізді ойластыруымыз керек. Қазақстандағы атом электр станцияларының алдағы жүз жылдағы қажеттілігін өтеуге мүмкіндік беретін уранның мемлекеттік стратегиялық резервін құру туралы ұсынысты жан-жақты қарастыру қажет деп есептеймін», – деді президент.
Мемлекет басшысының айтуынша, АЭС құрылысына қатысатын шетелдік серіктестерді Қазақстанда жоғары технологиялық өндірістер ашуға, атом энергетикасы саласындағы білім мен тәжірибені беруге, отандық атом мамандарын даярлауға тарту маңызды.
«Мұндай ұсыныстар ресейлік және қытайлық компаниялардан түсіп жатыр (…) Әрине, келіссөздердегі барлық ұстанымдар Қазақстанның ұлттық мүдделері тұрғысынан мұқият пысықталып, келісілуі тиіс», – деп түйіндеді ол.
Қазақстанда бірнеше атом электр станциясын салу жоспарланған. Алғашқы «Балқаш» АЭС-ін «Росатом» компаниясы салады. Қуаты ВВЭР-1200 болатын екі атом энергоблогының құрылысы жөніндегі жол картасына 2025 жылы қол қойылған. Станция құрылысы шамамен 11 жылға созылып, 2035–2036 жылдары аяқталуы мүмкін. Балқаш көлінің жағасындағы Үлкен ауылы маңында зерттеу жұмыстары 2025 жылғы 8 тамызда басталды.
Әрқайсысының қуаты 1200 МВт болатын екі энергоблоктан тұратын екінші «Мойынқұм» АЭС-і де Балқаш маңында салынады. Екінші атом электр станциясының құрылысына басымдық берілетін серіктес ретінде қытайлық CNPC компаниясы қарастырылып отыр.
Тағы екі АЭС салуға арналған алаңдар зерттеліп жатыр.
