Мәскеу. 27 қараша. ИНТЕРФАКС – Жапониялық азық-түлік және сусын өндіруші Asahi Group компаниясы қыркүйек айында болған кибершабуыл салдарынан 1,9 миллион адамның жеке деректері таралып кетуі мүмкін екенін мәлімдеді.
Компанияның мәліметінше, деректердің таралуы қызметкерлер мен олардың отбасы мүшелеріне, сондай-ақ тұтынушыларды қолдау орталықтарына жүгінген азаматтарға қатысты болуы мүмкін. Несие карталарына қатысты ақпараттың таралмағаны айтылды, алайда аты-жөндер, тұрғылықты мекенжайлар, электрондық пошта мекенжайлары мен телефон нөмірлері тарап кеткен болуы мүмкін.
Asahi компаниясы қыркүйек айының соңында тапсырыстарды қабылдау және жеткізу жүйесіне кибершабуыл жасалғаннан кейін кейбір сусын өнімдерінің жеткізілімін уақытша тоқтатқан болатын. Сондай-ақ компания Жапониядағы 30 зауытының көпшілігінде өндірісті, еншілес ұйымдардың тапсырыстарын қабылдау және жеткізу жұмыстарын, тұтынушыларға қызмет көрсету желілерін, соның ішінде колл-орталықтарды уақытша тоқтатты. Компанияның мәлімдеуінше, бұл шабуыл бопсалау мақсатында жасалған.
Asahi компаниясы 1889 жылы құрылған. Ол Жапонияда ең танымал Asahi Super Dry сырасы, сондай-ақ Peroni және Pilsner Urquell брендтерінің иесі болып табылады.
