Париж. 28 шілде. ИНТЕРФАКС – Францияның Жаңа Аквитания өңірінде жалғасып жатқан орман өрттеріне байланысты ауа сапасы нашарлады. Бұл туралы сейсенбі күні Le Figaro газеті хабарлады.
«Жаңа Аквитания өңіріндегі ауа сапасы төмендеді», – деп мәлімдеді өңірлік денсаулық сақтау агенттігі.
Хабарламада айтылғандай, дүйсенбі күні Жиронда, Ланд және Ло мен Гаронна департаменттерінде ауадағы ұсақ бөлшектердің шоғырлануы халыққа ескерту жариялау қажет деңгейден асып кеткен.
22 шілдеден бері ірі орман өрті жалғасып жатқан Жиронда департаментінде өрт сөндірушілер сейсенбіге қараған түні жағдайды жалпы бақылауда ұстай алды. Өрт шарпыған аумақтың көлемі 42 мың гектар күйінде қалып отыр.
Тілсіз жау 420 ғимаратты жойып, шамамен 220 мың адам эвакуацияланды. Өртті сөндіруге 2 750 өрт сөндіруші, 1,5 мың әскери қызметкер және 1 440 құқық қорғау қызметкері жұмылдырылған. 93 өрт сөндіруші жарақат алған.
Аптап ыстықтың жаңа толқынына байланысты департамент билігі сейсенбі күні Лакано коммунасындағы кемпингтерден туристерді эвакуациялау туралы шешім қабылдады.
Дүйсенбі күні Франция президенті Эмманюэль Макрон 23 шілдеде Ланд департаментінде басталған орман өрті оқшауланғанын мәлімдеді. Бұл өңірде өрт 3,6 мың гектар өсімдік жамылғысын және 198 ғимаратты жойған. Эвакуацияланған 30 мың тұрғынның шамамен 8 мыңы үйлеріне оралуға рұқсат алды.
Орман өрттері Испанияда да жалғасып жатыр. Соңғы бірнеше күнде 170 мыңнан астам адам эвакуациялануға немесе жүріп-тұруын шектеуге мәжбүр болды. Сейсенбі күні билік Мадрид маңындағы жағдайдың жақсарғанын хабарлағанымен, өрт әлі толық бақылауға алынған жоқ.
