Вашингтон. 10 қараша. ИНТЕРФАКС. Германия билігі «Солтүстік ағын» және «Солтүстік ағын – 2» газ құбырларына жасалған жарылыстарды тергеу аясында жеті адамға қамауға алу туралы ордер шығарды. Бұл жөнінде The Wall Street Journal газеті дүйсенбі күні дереккөздерге сілтеме жасай отырып хабарлады.
«Кемелерді жалға беретін компанияларды, телефон нөмірлерін және көлік тіркеу деректерін бақылау арқылы Потсдам қаласындағы полиция детективтерінің тобы Германия билігіне арнайы украин әскери бөлімшесінің үш жауынгері мен терең суда жүзу тәжірибесі бар төрт сүңгуірге қатысты ордер беруге мүмкіндік беретін мәліметтер жинаған», – делінген мақалада.
2022 жылдың қыркүйегінде Данияның Борнхольм аралына жақын маңда «Солтүстік ағын» құбырының екі желісі және «Солтүстік ағын – 2» құбырының бір желісі жарылыс салдарынан зақымданған болатын. Ресейде бұл оқиға бойынша «халықаралық терроризм» бабы бойынша қылмыстық іс қозғалды.
Биылғы тамыз айында Германияның прокуратурасы Украина азаматы Сергей Кузнецовтың Италияда ұсталғанын хабарлады. 21 тамыздан бастап ол Риччоне курорттық қаласында қамауда болды. 16 қыркүйекте Италия соты оны Германияға экстрадициялау туралы шешім шығарғанымен, қорғаушы тарап бұл шешімге шағым түсірді.
Бұған қоса, 30 қыркүйекте Польшада “Солтүстік ағын” құбырларын жарып жіберуге қатысы бар деген күдікпен Украина азаматы Владимир Ж. ұсталды. Оған Германия барлау қызметі берген Еуропалық тұтқындау ордері негізінде іздеу жарияланған болатын. Алайда қазан айында Польша соты оны Германияға экстрадициялаудан бас тартып, оны дереу босату туралы шешім қабылдады.
