Мәскеу. 10 қараша. ИНТЕРФАКС. Америкалық фармацевтикалық алып Pfizer Inc. семіздік пен кардиометаболикалық ауруларды емдеуге арналған препараттар әзірлейтін Metsera Inc. компаниясын сатып алатынын мәлімдеді. Келісім құны 10 миллиард АҚШ долларына дейін жетуі мүмкін.
Metsera таратқан ресми хабарламаға сәйкес, Pfizer компания акциясының бір данасы үшін 65,6 доллар төлеуге келіскен. Бұдан бөлек, Metsera акционерлері АҚШ-тың Азық-түлік пен дәрі-дәрмек сапасын бақылау басқармасы (FDA) тарапынан белгілі бір дәрілерге мақұлдау алынған жағдайда, әр акция үшін қосымша 20,65 долларға дейін ала алады.
Осылайша, Pfizer компаниясы Metsera-ның әр акциясы үшін жалпы 86,25 долларға дейін төлеуі ықтимал.
Еске сала кетейік, Pfizer биыл қыркүйек айында Metsera компаниясын 7,3 миллиард долларға сатып алу туралы келісім жасаған болатын. Алайда кейінірек Даниялық фармацевтикалық алпауыт Novo Nordisk Metsera-ға шамамен 9 миллиард доллар көлемінде тиімдірек ұсыныс жасады.
Осы жағдайдан кейін Pfizer өз ұсынысын қайта қарап, жақсартылған шарттар ұсынды. Нәтижесінде Metsera-ның директорлар кеңесі акционерлерге дәл осы ұсынысты қолдауға кеңес берді. Мәміле 13 қарашада өтетін арнайы акционерлер жиналысынан кейін жабылуы тиіс.
Novo Nordisk өз кезегінде ұсынысын қайта қарастырмайтынын хабарлады.
Metsera компаниясы 2022 жылы құрылған. Штаб-пәтері Нью-Йорк қаласында орналасқан.
