Брюссель. 5 тамыз. ИНТЕРФАКС – Израиль әскері мен «Хезболла» қозғалысы арасындағы қақтығыстар салдарынан туған жерін тастап кетуге мәжбүр болған 800 мыңнан астам ливандық өз үйлеріне қайта орала бастады. Бұл туралы БҰҰ-ның Гуманитарлық мәселелерді үйлестіру басқармасы (OCHA) мәлімдеді.
30 шілдедегі мәліметке сәйкес, туған жеріне қайтуға ниет білдіргендердің саны 821 мың 77 адамға жеткен. Соған қарамастан, 360 мыңға жуық адам әлі де уақытша паналап отырған өңірлерінде қалып отыр. Оның ішінде 26 мың адам мемлекеттік уақытша орналастыру орталықтарында тұрады.
БҰҰ мәліметінше, Ливанның оңтүстігіндегі су және электр инфрақұрылымының зақымдануы салдарынан 700 мыңнан астам тұрғын ауызсуға қол жеткізуде қиындық көріп отыр.
Сонымен қатар, сейсенбі күні Римде АҚШ-тың арағайындығымен Ливан мен Израиль арасындағы тікелей келіссөздердің жетінші кезеңі басталды.
Осыған қатар Ливанның оңтүстігінде «пилоттық аймақтар» жобасы іске қосылды. Жоспарға сәйкес, Израиль әскері Ливан аумағынан кезең-кезеңімен шығарылады, ал белгіленген аймақтардағы «Хезболла» жасақтарын Ливан армиясы қарусыздандыруы тиіс.
Алғашқы пилоттық аймаққа Зактар әл-Ғарбия ауданы мен Фрун және Срифа ауылдары енгізілді. Ал көршілес Зактар әл-Шарқия елді мекені әзірге Израиль бақылауында қалып отыр.
АҚШ Мемлекеттік департаменті пилоттық аймақтар жобасының басталуын сәтті қадам деп бағалады.
Алайда Ливан билігі Израильді қол жеткізілген келісімдердің орындалуына кедергі келтіріп отыр деп айыптады. Соған қарамастан, Бейрут бұл тетікті басқа өңірлерге де кезең-кезеңімен енгізуге дайын екенін мәлімдеді. Осы аптада пилоттық жобаны қамтитын жаңа аумақтарды белгілеу мәселесі талқылануы мүмкін.
