Астана. 22 сәуір. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев Қырғызстанның Аралды құтқару халықаралық қоры құрамына қайта қосылатынына үміт білдіріп, бұл елдің қатысуы Орталық Азиядағы су саласындағы ынтымақтастықты нығайту үшін маңызды екенін атап өтті.
«Белгілі болғандай, Қырғызстан қордағы қызметін уақытша тоқтатты. Бұл – Қырғыз мемлекетінің егемен құқығы, және Қазақстан оны құрметтейді. Сонымен қатар біз ведомстволар арасындағы жұмыс деңгейіндегі байланыстардың дамуын жоғары бағалаймыз және алдағы бірлескен жұмысты жалғастыруға дайынбыз. Қырғызстанның тәжірибесі бүкіл Орталық Азияның орнықты дамуы үшін аса маңызды. Сондықтан уақыт өте келе Қырғызстанның қордағы қатысуы қайта жанданады деп сенеміз. Біз мұны құптар едік», – деді Тоқаев Астанада өткен қор құрылтайшы мемлекеттер басшылары кеңесінің отырысында.
Президенттің пікірінше, өңірде су және экологиялық мәселелер күшейіп отырған жағдайда, елдердің күш-жігерін біріктіру, өзара түсіністік танытып, келісімдерге келу арқылы ортақ шешімдер табу ерекше маңызды.
Айта кетейік, Қырғызстан Аралды құтқару халықаралық қоры жұмысына қатысуын 2016 жылы тоқтатқан.
