Астана. 24 қыркүйек. ИНТЕРФАКС-ҚАЗАҚСТАН – Қазақстан Президенті Қасым-Жомарт Тоқаев барлық деңгейдегі мәслихаттардың өкілеттігін мерзімінен бұрын тоқтату мәселесі бойынша жақын арада консультациялар өткізетінін мәлімдеді.
«Жақын арада Премьер-министрмен және Құрылтай төрағасымен барлық деңгейдегі мәслихаттардың өкілеттігін мерзімінен бұрын тоқтату жөнінде консультациялар өткіземін. Соның қорытындысы бойынша тиісті жарлыққа қол қоямын», – деді Тоқаев бейсенбі күні Халық кеңесінің алғашқы сессиясында.
Одан кейін Орталық сайлау комиссиясы алдағы сайлаудың өтетін күнін белгілейді.
«Бұл қадам мәслихаттардың білікті әрі кәсіби құрамын жасақтауға жол ашып, олардың жұмысына жаңа серпін береді. Сіздер де осы сайлауды жоғары деңгейде өткізуге елеулі үлес қосасыздар деп сенемін», – деді Президент.
Мемлекет басшысы қазіргі заман талабына сай елдегі мемлекеттік басқару жүйесі ауқымды өзгерістерден өтіп жатқанын атап өтті.
«Бұл жұмысты жалғастыру қажет. Өзгерістердің қорытынды кезеңі барлық деңгейдегі мәслихаттардың сайлауы болмақ. Қазіргі депутаттар Конституция мен заңдарда көзделген негіздер бойынша өкілеттігі тоқтатылғанға дейін өз міндеттерін атқара береді», – деді Тоқаев.
Президенттің айтуынша, мәслихат депутаттарының басым бөлігі Amanat партиясынан сайланған.
«Қазір бұл партия «Әділет» партиясына қосылғандықтан, дербес қызметін тоқтатты. Тиісті заңдық рәсімдер жақын арада аяқталады. Осыдан кейін мәслихат депутаттарының басым бөлігінің өкілеттігіне қатысты құқықтық мәселе туындайды», – деді Мемлекет басшысы.
Тоқаев мәслихаттар жергілікті жерлерде тұрғындардың мүддесін білдіру, бюджетті бекіту және өңірлердің дамуын бақылау жөніндегі міндеттерін толық атқаруға тиіс екенін атап өтті.
«Бір сөзбен айтқанда, олар жергілікті жердегі халықтың әл-ауқатын арттыру ісіне белсенді араласуы керек. Өкілді органдардың қызметі заң талаптарына сай жүргізілуге тиіс», – деді Президент.
